نفسي سوده مضلمـــــه

وسط النهار و الدنيا حر ..و الوقت مش عايز يفوت ..
دق الجرس دقات بحزن .....تنده بنوح واحد ميت
خرجت اشوف فيه ايه حصل ..قالوا ان فيه ميت وصل
و لقيتني نايم في التابوت .
و ضحكت في الأول و قلت
: " انا لسه باتحرك باعيش ..ازاي تقولوا اني مت ..
و صرخت بس ماسمعونيش."
و سمعت ناس بتحبني ..بتقول ده كان طيب قوي
و سمعت ناس بتسبني بتقول ده كان شرير اوي
و لما جات ساعة الحساب..لقيتني مطرود من السما مقفول في وشي كل باب ..
و نفسي سوده مضلمـــــه
فتحت عيني
لقيتني حي ..و الشمس مايلة للغروب ..
فشكرت ربي انه حلم و عاهدته اني ارجع و اتوب

كلمات ترنيمة قاسية جدا لما سمعتها
لكن دي لحظة ..اللي بيفتكرها ..بيقولوا له ..:" ياعم افتكر خير .."
(هوذا أنا عتيد أن أقف أمام الديان العادل ..مرعوبا و مرتعبا من كثرة ذنوبي )
و لكن (عندما تأخذني الرعدة ,,اهرع اليك يا محب البشر )
ممكن اللحظة دي تكون لحظة انطلاق و فرحة و سرور لنفسنا ..نتمناها اننا نتقابل مع العريس السماوي ....لو بدأنا توبة صح ..و مشينا فيها صح ...
لكن لما افكر الاقي ان مهما عملنا و تبنا ..من غير مراحمك يارب مانقدرش حتي نفكر اننا ممكن نكون جنبك في ملكوتك ......
فعاملني يارب بحسب جودك و رحمتك ..لا كحسب كثرة خطايانا ..
و ساعدنا يارب نبدأ توبة صح ..و نكمل فيهــــــا
مرر كل حلاوة العالم في حلقنا ....
و كفاكي يا نفسي جري ورا آبار العالم اللي عمرها ماشبعتك ...
(لأنها كانت آبار مشققة لا تضبط ماء ..)
تعالي لحبيبك اللي ها يشبع بالخير عمرك ..فيتجدد مثل النسر شبابك
ساعدنا يارب